wei yin's profile慧賢媽媽～世上只有PhotosBlogListsMore  |  Tools Help |
|
November 04 平淡的09年生日09年的生日在平淡中渡過了! 那天沒有慶祝活動，還要背著許許多多的文件回家做，那天還要返學添!雖然生日都在忙碌中渡過，但感謝每一位的生日祝福。沒想到今年的生日會收到很多的生日message，從facebook、手機SMS收到的。這是我咁多年生日裏收到最多生日祝福的一年啦! 多謝我既IVE同學，陪伴了我過了一個歡笑而不沉悶的生日! 多謝曾校長既芒果布甸，簡直有「雪中送炭」的感覺，給我一個小鼓勵繼續去開OT! 最後，要多謝老公同囡囡啦! 雖然老公因工作要開OT，以至未能同我正日慶祝生日，但係多謝你有行動去嘗試約人陪我吃「生日飯」。其實那天昫穎有送個「Big hug」及「香吻」給我做禮物架! 這叫我已經甜到入心啦!
說實話：現在的我已不再注重什麼慶祝活動了，但求在大時大節能與家人(我的媽媽、家姐、老公、昫穎)一齊吃餐便飯已經好滿足了! 因為我的主會給我更多更多的禮物呢!
October 22 小昫穎就快14個月了日子真係過得好快，囡囡今個月晚 25號就已經14個月啦! 現在已行得穩步上揚的昫穎，在家裏時常四圍行，又成日跌倒或撞到"於"哂，真係要看牛仔咁看管，睇少一眼就唔知去左邊? 雖然我地間屋唔大，但係對於小昫穎來說，間屋真係好大、好好玩添! 點解? 因為工人話我知個百厭妹曾經玩到躲到床下底，赫到工人心肝都出埋，以為唔見左佢。點知在她的床仔底下找回她，哈哈! 其實都幾攪笑，都無出街，d窗又有窗花，又點會唔見左BB呢? 哈哈，小昫穎越來越鬼馬了!
唔知係咪個個父母都會覺得自己個仔或者個女都係好叻呢? 我老公成日話小昫穎聰明，她現在已懂得聽許多的指令，又懂得辨認動物，又懂得指出四官，並會做出好多鬼馬行為，如：豬咀、側頭、學人用手掩面玩"躲貓貓"、依開牙齒給人看等等.......... 佢D行為真係好得意，逗得個個都好開心!
我地仲發現昫穎都幾多"粉絲"架，佢D相一旦UPLOAD上facebook，就馬上有人回應，真係多謝各位朋友對我們小昫穎的愛戴! September 25 結婚3週年轉眼間，我地結婚已3年了! 時間真係過得好快，不知不覺我地有了自己的BB添! 她已經1歲了。
婚後這3年真的過得很快樂，除了有了自己的家外，真的感受到"擁喂有一個和諧的家"既溫暖。多謝ALVIN給予我有這個夢想的家，亦多謝老爺、奶奶教曉我很多與家人及孩子相處之道，我會銘記於心，亦會像你們一樣用身教來教導我的下一代。
雖然今天沒有慶祝活動，因為我要返夜學，以及Alvin真的忘記了今天是結婚3週年的日子，但係無所謂啦! 一切盡在不言中，最緊要係老公每天都錫我同昫穎就足夠了!
August 26 小昫穎1歲生日快樂轉眼間，我們的小昫穎已經1歲啦! 回想我在瑪麗醫院待產的日子，真是百感交集呀!
我真係要感恩，天父給我這1年過得很快樂，給我們有了昫穎這個開心果，給我們可以深深體會到做父母的辛酸經歷!尤其是在加拿大旅遊的3星期，深深體會到「全職父母唔易做」.....但感謝主給我們有一段難忘回憶!
今天，雖然我好夜放工，Alvin又要通宵，但係我仍然有買個小蛋糕同昫穎慶祝生日。我等埋奶奶做YOGA回來後，便一起切蛋糕、唱生日歌，哈哈，大家都好開心呀! 大家仲換件靚衫同昫穎映相添! 小昫穎都有換件「和服」搶鏡。
整間屋就因這小人兒而充滿無限的歡樂與笑聲.......
昫穎，生日快樂!祝你健健康康，快高長大!  July 14 昫穎學識"錫錫"及BYE BYE啦不知不覺昫穎就１０個半月啦！她越來越有趣，學習能力非常高。我們跟她說或教她做一些簡單事情，她都好快學識，例如：她已學識將手上的物件與人分享，又懂得＂錫錫＂，又懂得跟別人＂ｂｙｅ ｂｙｅ＂，哈哈，她還愛用食指指著東西添！她要我抱她時，會叫媽媽！昫穎真係個逗人開心的"開心果"呀!
好緊張呀! 還有4日就會起程去加拿大啦! 希望昫穎坐機時唔好咁扭計，昫穎! 你要做小乖乖呀~ 如果唔係媽咪就慘啦! June 19 懷念的蘇屋村!今日看電視提醒了我蘇屋村快要拆啦，又喚起了掛念阿爺的心情! 真是捨不得這麼有特色的村屋被拆卸，真的捨不得有懷念價值的屋被拆卸，真的捨不得有著幾十年爺爺氣味的家被拆卸! 這樣告訴了我~~爺爺真的已離開了我們了!
還記得16號那天，當我見到爺爺躺在棺材裏，我真的哭起來，哭到呼天搶地。想不到認識了這位老人家只是短短的2-3年，我竟會這麼捨不得他，可能因為我真的很喜歡時常笑的人，我真的很少接觸到年紀這麼老，會時常帶著笑容的長者。又或者說他們陳家上下真的對我實在太好了，讓我可以時常感受到"愛"，亦可能因為......................
世界有很多事都不能解釋，一切都是因為有"愛"!!
蘇屋村再見啦! 我們最敬愛的爺爺、昫穎的太爺爺.................永別了!
 每當我想起爺爺就會哼起這首歌：
《彩虹下的約定》
我空虛的心靈終於不再流淚，期待著雨後，繽紛的彩虹，訴說我們的約定。
我不安的腳步，終於可以停歇，主您已為我擺下了生命的盛宴......................
(願爺爺現在都是享受生命的盛宴)
June 01 BB笑容選舉入圍上幾個星期我幫昫穎報名參加了一個由生活易舉辦的「BB笑容選舉比賽」，今日收到生活易既職員電話，他說昫穎已經入左圍啦! 現在要等Final既選舉及投票，好快就有結果了! 哈哈，唔知囡囡既招牌笑容會唔會被大家公認為最燦爛笑容呢?  May 27 太爺爺永別了!我們太爺爺走左啦!
 剛剛收到我老公既電話，他說現在明愛醫院，我真的嚇一跳，以為他發生了什麼事，我再三追問發生什麼事，他用強忍的淚水的聲音說：「阿爺..............走了!」唉! 呢個消息真係好突然，聽Alvin說阿爺今朝仍然跟老爺飲茶，但晚上卻無端端抽筋，之後就入了明愛醫院..........
回想起上個星期跟太爺爺慶祝他的90歲大壽，我們還說太爺爺很精靈，還可以跟我們一起吃buffet，中西食物、甜品樣樣都吃，但我們看見阿爺廋了一個圈，以及看見阿爺面色不太像之前，好像皮膚黑黑的，想不到今個星期阿爺就走了....................
但可惜在他有生之年未能向他傳福音，未能跟太爺爺在天國再遇了! 但感謝主在太爺爺在生時候，給我們有陳昫穎這個小可愛，讓太爺爺看到及抱到他的曾孫，總算給了太爺爺有一個完美的回憶!
我們尊敬的太爺爺：
永別啦! 我們會永遠懷念你!  May 25 昫穎9個月了今日係昫穎9個月既日子，睇番昫穎由出生到現在的照片，真係有好大既改變。出世時，是一隻好醜樣既狗仔，眼細皮膚又黑，一到洗澡時間就會喊到變關公，把喊聲又大。到現在9個月啦，雙眼大番D，皮膚白白滑滑的，但手腳依然是古銅色的，但都算幾精靈，已懂得自己扶著家具站起來，學會慢慢坐下，更會扶著家具由SOFA一端走到另一端，近呢個星期仲學人唱「太空話」既歌添! (現在已不再成日叫「阿爸」，改了時常自己玩玩具時「依依呀呀」咁講野!) 真係好可愛!
最近跟其他幾位同在瑪麗醫院生B的媽咪傾電話，發現昫穎比起同年紀的BB食粥既餐數多過人，食奶既安數又唔差，但係唔明白現在都是細碼(昨晚磅過有17.5磅)，唔通阿女似我? 細個既時候就係好廋既，一到發育時期就開始肥到收唔到....................
 不過我同老公都話，只要昫穎健健康康，即使係細碼BB都無所謂啦!我統計過昫穎現在每天的食量，她1天內食5餐，早晚各1餐8安奶，中間3餐粥(其實可以叫做"飯仔"，因為D粥好杰身同埋我開始把部份既蔬菜切粒，比昫穎訓練咀嚼能力) 每餐粥仔可以吃清一個暖水壺份量既粥，每日仲可以飲到8 安水或以上添，其實阿女食量都幾利害架! 昫穎加油呀!!! May 16 昫穎成長路之8個半月 呢兩個星期發現陳昫穎又叻左，除了爬得好了之外(可以四腳爬爬有一段時間)，還有反應多了，例如：一講"DADDY呢?"囡囡就會望住我老公，講"媽咪呢"就會望住我，又貪玩了很多，每當我們做一些誇張的表情及動作，昫穎都會笑到「哈哈聲」。現在既陳昫穎已經懂得坐下及起身，愛扶著電視櫃起身後，把東西翻到地上，以及好喜歡一隻手捉著櫃邊，一邊身就彎下拾起東西，哈哈，囡囡真厲害，開始懂得平衡身體，不會讓自己掉落地。
最近還發現昫穎可以自己拿著奶瓶喝飲料啦，時常愛自己拿著奶瓶喝水，當她想喝水時，就會「呀呀叫」，叫你拿水給她喝，真係好攪笑! May 10 第一個母親節自從有了陳昫穎之後，每逢什麼節日都應該係好開心，但係今年既母親節(我的第一個跟媽媽一齊過的母親節)一點也不開心!
剛剛過了的星期六，約左媽媽食飯慶祝母親節，我地去了尖沙咀的印尼餐廳食晚飯，未吃飯之前都好開心，因為昫穎逗到婆婆好開心，婆婆做了好多衫仔、頭巾仔比昫穎，昫穎一到鋪頭就試衫，又帶BB去見下左鄰右里，跟住仲可以抱到昫穎訓著添! 我想婆婆會覺得好有滿足感! 食完飯走啦! 我阿媽唸住好耐都無出尖沙咀，又難得可以抱住昫穎行街，就同我地講想行多一陣先走，我其實真係無所謂，難得阿媽咁高興，都想陪佢多一陣，點知我老公就黑面，仲話：你地唔係想抱住陳昫穎行街MA? 仲叫我地比番個女佢，驚死我地帶埋阿女唔知去左邊咁。好啦! 我見D鋪頭都收得七七八八，加上唔想我老公唔鐘意，於是就無行街，一齊去攞車，行到巴西餐廳樓下，醒起我地今日無影相，就即刻叫住我老公，請佢幫我同阿媽影番張相留念，點知佢竟然又reject我，話果度好黑影得唔靚，無舉動拿相機，亦都無其他建議，只係企左响度問我想點。結果因為開始下微微雨，所以到最後都係無影相走左!
我真係好嬲呀! 話哂係我第一個同我阿媽過的母親節，佢居然一d都唔比面(黑面)，仲連我唯一最想做既映相留念都竟然reject我! 我真係好激氣，依家越唸就越想喊呀! 因為我唸如果換轉今日係同我奶奶慶祝母親節，我老公既表現一定唔會係咁，至少一定唔會reject奶奶既提議，同時一定會同我奶奶及阿b映相留念!
仲有我發現原來有了信女之後，老公真係唔會點理個老婆，以前每逢過什麼節日，我老公一定會送禮物或者會買個蛋糕回來同我慶祝，但係今年既母親節，一條雞毛都無，但係卻賣了幾百蚊衫仔比昫穎，唉! 唔通真係比同事講中左，我一定會呷昫穎唶?
April 26 昫穎8個月啦!昨日係新生買校服既日子，亦是昫穎寶寶8個月大既日子。不知不覺我地既昫穎囡囡已經8個月大啦，由初生一團飯咁，直至現在懂得坐、爬、叫「阿爸」、大笑等，真係好感恩!
看到今天來學校交書簿費，買校服既小朋友，就不禁想起昫穎。自己在想：「唔知道將來昫穎考幼稚園既表現會係點樣呢? 穿起校服個樣可愛嗎? 」哈哈.............想呀想，只不過是希望昫穎會是一個健健康康，聰明伶俐，敬人愛主，孝順父母既人!
昫穎，加油啊! April 08 昫穎最愛企............今日返到屋企，昫穎剛剛食緊奶，支奶食到一半就扭計，於是嬲嬲地就放佢在床，點知佢喊到面紅耳熱，呼天搶地咁，真係比佢激死! 本來都好想任佢喊，睇下昫穎扭計(喊)幾耐，但係又唔想老公返來時看到我好像唔理BB喊，於是我就拉起佢企在床邊，哈哈! 昫穎一起身就馬上收聲，連眼淚都即收，真係比佢激死!昫穎最近好鍾意企，佢可以自己捉住床邊企15分鐘都唔跌，仲好鍾意企在床邊睇電視添! 我地擋住佢，佢個頭就"拎來拎去"，搵個CUSHION擋住佢，BB會用手拉開，慕求睇到電視為止。今日我又唔比佢睇電視，佢扭哂身咁睇，結果比我個身擋住，無可奈可之下，佢就咬床邊，同埋係度講野，哝哝呀呀咁! 唔知佢係咪同我講叫我行開唔好擋住佢睇電視呢? |
|
|
