wei yin's profile慧賢媽媽～世上只有PhotosBlogListsMore  |  Tools Help |
|
October 16 昫穎特訓之媽咪澳門兩天遊趁我還未返工，老公同我決定去2日澳門散散心! 起行前幾日，真係有點不放心，因為阿女還未肯全用奶樽食奶，擔心阿華同家姐攪唔o店昫穎，又擔心阿女會唔會喊到唔收聲變了"鵝公喉"呢? 但係12號果日老公話我知已經訂左房，就唯有祈禱希望阿女呢兩日乖乖地聽話啦!同時當係比昫穎豬一個考驗及訓練啦!
出發前，先教定工人姐姐餵食奶粉及人奶既次序，然後埋身餵完阿女，就換衫出發啦!我地途中都有用電話上網望下阿女及打電話回家問下昫穎食奶情況。我地發現昫穎好乖，2日以來都肯用奶樽食奶，仲食得多左添!(可能平時比佢埋身食，所以唔知佢原來食咁多，平均2個鐘食一次，每次都食2安)只是晚上扭計要埋身啜，但最終昫穎喊到累了"訓"左!
家姐話昫穎豬豬呢兩日既表現有80分，除了間中扭下計，要佢地論流抱之外，其餘時間都好乖，佢地仲發現昫穎每次望住"麥當勞仔仔"張相都會笑到好開心呢!真係有趣啦!hahaha........
講下呢兩天澳門之旅，因為我地太耐沒去澳門啦，好多事物地方都唔同哂!(多左好多賭場及酒店)我地住既"威尼斯人"真係好大好靚，好多名店，又有開演唱會既地方，泳池做SPA既地方都好大好豪華。不過我地沒有盡用酒店既設施，我地最主要在澳門行下。
第一日我活動範圍都係在氹仔，搵左阿VAN食午餐，然後在威尼斯人行個圈，拍拍照，又行下黑沙，去安德魯餅店食葡撻，晚上再跟富+VAN兩公婆一齊食晚飯。有地頭蟲帶路係唔同D，果餐葡國菜真係好正，好地道。同時我都好耐無食過咁重味既飯菜啦!真係一個大放肆呀!第二日早上就check out，跟住就乘車到澳門碼頭那邊啦!實在太耐沒有來啦!真係變左好多，以前回力賭場一帶都好繁榮，現在就變得人流好複雜，又好污漕.............我同老公行了一陣手信街，到了大三巴拍拍照就馬上回港啦!因為太掛住昫穎啦!想快d返去抱下佢，錫下佢。
雖然只是2日1夜的澳門之旅，但我已覺得好滿足，一來係太耐無離港旅行，二來可以在平日離港旅行，感覺好舒服(因不會太多人)，三來可以兩公婆輕輕鬆鬆去旅行(唔駛帶bb)，所以覺得呢個旅行真係有十萬個恩典啦! October 06 太爺爺跌到呀!昨日是星期日，工人姐姐放假，原本想帶昫穎豬豬去CICI家探下珈而，順便攞埋D思詩樂乾棉。點知昨日早上奶奶話比老公知阿爺在家唔小心跌低左，仲暈過一陣，佢又唔肯去醫院，老爺同依俐當然連忙出去睇佢啦! 我老公也急急腳出去睇下阿爹 。因為怕要送阿爺(昫穎太爺)入院檢查，所以我同昫穎就留在家，沒有跟他們出去。
唉! 我以為今日又會同阿女閉關啦! 點知在我老公出街不久，就收到詩姐電話，佢話想來探BB喎，連佢奶奶都話來，哈哈! 當然歡迎啦! 有人來探我地喎，唔駛2個人閉關，仲可以同可愛既森瀅玩，真是高興到不得了呀!
昫穎豬真係好比面，人客來到就唔訓，猛咁哝哝呀呀同人講野，又識得望鏡頭映相，真係攪笑又可愛! 森瀅仲得意，一開門就即刻人屋除鞋，仲除埋個背包仔添! 跟住就即刻想睇BB。 佢真係好叻，2歲人仔識講好多野，又時常做出古靈精怪的動作，例如: 讚佢好靚又識講"多謝"，問佢點樣kawakii，佢又識得做個可愛笑臉等。我覺得生女真係好，除左可以同佢扮靚之外，佢地細細個時通常都會唱歌跳舞比daddy mummy睇，又會成日做出d可愛行為，逗到人鬼咁好開心!
我唸陳昫穎都會好快識講野(因為現在已經成日"哝哝呀呀"同人講野)，又會鐘意跳舞、唱歌(似阿媽有表演慾ma)，一定會逗到爺爺、grandma好開心o即! 我好希望昫穎是個人見人愛的人，真係可以好似佢個名咁時常帶給人有溫暖!
October 04 昫穎奶咀專門店昨日聽詩姐講佢有個朋友都好似我阿女咁唔肯用奶樽食奶，原因係個奶咀唔夠"琳"及唔啱咀形，結果佢朋友用了個"NUK"母乳奶咀，佢阿B就肯食。我昨晚買左個比昫穎試用，希望阿女肯用啦! 感謝主, 昫穎豬終於肯嘗試用奶樽食奶奶，昨晚6點果餐開始試，直到今朝都肯用。昫穎豬，希望你乖乖地繼續肯用呢個奶咀啦! 如果再唔肯用，媽咪真係可以開番間奶咀專門店啦!
小插曲：
今朝我要去銀行，回程時候經過Disdeyland童裝專門店，廚窗貼哂紙話最後清貨之類字眼，見有時間咪入去睇下law，發現D衫真係好抵，大部份都係半價。結果簡下一件，簡下又一件，足足買了20幾件(衫、裙、褲都有)先肯收手，仲做埋會員添! 昫穎，你就發達啦，有咁多靚衫著，媽咪就大出血啦! October 02 一個好消息與一個難題昨晚是昫穎滿月宴的大日子，好多親戚朋友都好比面一家來恭賀我地既寶貝女，有些親戚仲好早約埋打牌添!
昨晚跟同桌的三舅母傾開揍BB，才知道原來BB夜晚果餐奶隔6個鐘先起身食，就即是代表已經介左夜奶，eee............咁我地昫穎咪已經開始介夜奶? 因為我發現從9月30日開始，夜晚餵完囡囡最後果餐(約11:30-12:00)，囡囡第2朝約6:00am才起身叫食，哈哈................估唔到阿囡滿月不久就已經介了夜奶，真係要感謝神啦!
但係我噙日同時發現了一個"非常"難題，就係昫穎豬唔肯用奶樽食奶，即使逗她、換個別的奶咀，她也不吃，哭好耐好耐，佢d眼淚就一泡泡流出來，見到都心痛，於是都忍不住比佢埋身食。昨晚在酒樓，昫穎豬有段時間哭得好厲害， 阿華點樣逗她還是一直大哭，我看看隻錶已是9:00pm了，相信佢喊都係因為肚餓，於是我叫阿華開奶粉比昫穎食。奶就開好了， 點知我們怎樣逗囡囡都是唔肯吃。由於她喊到唔識收聲，無可奈何之下我就比佢埋身吃，好彩早有準備,帶定條scaft，咁就有可以坐埋一邊比佢埋身食。但係當時其實都幾狼貝，好彩有阿華同家姐幫手，我才不會走光! 結果阿女一埋到身就收聲，食了10分鐘就睡了添!
唉! 真係唔知點算，返工的日子就快到，囡囡一定要盡快適應用奶樽食奶奶，如果唔肯食就大鑊啦! 唔通要找個奶媽返來咩! 球姐及嘉儀媽媽都叫我唔好再比佢埋身食, 要比昫穎習慣下用奶樽。我亦都會忍心D唔理佢喊幾耐，只要讓她快點適應用奶樽就OK啦! |
|
|
